LE POMPE FUNEBRI
Nè Tito, nè Severo, nè Trajan
Tornava indrio da i campi de la gloria
Con più sfarzosi emblemi e più baldoria
Fra la calca del popolo roman.
De tanta pompa no ghe xe memoria
Nei funerali de l’eroe trojan:
No trovè tanto lusso zarlatan
Fra tute l’orgie de l’antica storia.
Spetacolo de cari e de cavai,
Peruche, fornimenti, penacioni,
Tricorni e fiori, mocoli e ferai;
Musiche turche e son de campanoni,
E una gran coa che no fenisse mai
De quei ch’in vita v'à secà i...
