Tuti quanti me dise: „Varà là,
Vu che andè in cerca d'un genial sogeto:
Varè là che magnifico quadreto
Pien de grazia, de brio, de novita!“
E i me mena davanti a un vaporeto1
Che vien fischiando alegramente in qua,
Stracarego de zente ch’al mercà
Vien col panier, la sporta e 'l cesteleto.
La machina e 'l timon se move ancora,
Che i salta come rospi su la riva
E in quatro slanzi el molo i se divora;
Ghe bagia i cani e spasemai li schiva;
D’ogni banda le guardie sbalza fora
Drio sta marmagia ch’à ciapà la briva;
E là, sul campo de la Piazza Magna
Come un stormo de corvi i se sparpagna;
In mancanza de pele de pantera,
Su le giachete i se stravaca in tera;
E ronchizando co la lengua fora
La fergnocola2 i speta de l’Aurora.
