Pagina:Raccolta di poesie in dialetto veneziano 1845.djvu/336

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.


     Ma pur d'un sol benefico,
     Che no ardarà la tera,
     E solo a le so viscere
     Moto darà e vigor.»
7I monti, la campagna,
     Quei prai, quel bel boscheto,
     Dove ti cori a sconderte
     Par farme a mi dispeto,
     Che colpo, che spetacolo,
     Che i gera ancuo per mi!
8Voltava l'ochio ai monti,
     No i gera più canui,
     Fissava sora i albori
     Che gera tuti nui,
     E a colpo d'ochio a nascerghe
     Vedeva e fogie e fior.
9Vedeva i prai coverti
     De mile e mile fiori
     Missiar a un verde languido
     Quei cussì bei colori;
     E andava via indorandoli
     A man a man el sol;
10L'istessa primavera,
     Che gera là sentada,
     A veder sto spetacolo
     L'ò vista za incantada,
     E verso el ciel fissandose
     Zontar suso le man.
11Come che la disesse:
     «O autor d'ogni creatura,
     Quanto che te ringrazio,
     Che per mia man natura
     Ti torni bela e zovene,
     E rinovar ti fa!»
12Oh se ti avessi visto
     A pie de la colina
     Quele disdoto piegore,
     Quele che ga Catina,
     Saltar come fa i daini,
     E farla disparar!
13Le armente de Lucieta,
     E i quatro vedelati,
     Che la conduse al pascolo,
     Pareva tuti mati
     Urtandose, scornandose,
     Senza saver perchè.
14I osei da un ramo a l'altro
     Cantando i saltuzzava,

     E dopo sbecolandose
     Insieme i smorosava:
     I smorosava, cocola:
     Femo cussì anca nu.
15E dopo sora un ramo,
     Fiorio mumenti prima,
     Dove scherzava un zefiro,
     I saltuzzava in cima,
     E i se formava un biscolo
     Col solo gorghizzar.
16Scometo che anca Lila,
     La seria pastorela,
     Che gera soto l'albero
     Tuta racolta in ela,
     Capiva che sta musica
     Ghe la ispirava amor.
17Mai m'ò godesto tanto
     Quanto che sta matina:
     Oh primavera amabile!
     No averte a mal, sa Nina,
     Che gnanca avicinarmeghe,
     Te zuro, no ò tentà.
18Anzi un momento dopo
     Che m'è scampà un'ochiada
     No l'ò più vista, acertite,
     E via la gera andada,
     E a fato fredo subito,
     E inuvolà s'à el ciel.
19Alora sì son corso
     Al logo che la gera,
     E ò tolto su sti anemoli,
     Che xe restai là in tera,
     E ò tolto su ste fragole,
     Che te consacro a ti.
20Ti ridi? ti me burli?
     Donca no ti agradissi?
     Xe vero, el don xe povero:
     E pur se ti capissi
     Che insieme a lu gh'è st'anima
     Che unito gh'è sto cuor;
21Forsi... ti ridi ancora?
     Ma quei bei lili... Nina...
     Ma quel mazzeto... mostrilo:
     Sconderlo! a la colina!
     Chi? ... cossa? oh sempio, oh stolido!
     Donca ti geri ti!
22Ti! ma i cavei? quel velo?
     Ti geri trasvestia?