1Co vedo l'omo nel so bel aspeto
Pianzer sul mal che i so fradeli agrava,
Smezzar co lori el pan, la vesta, el leto,
Difenderlo, scusarlo, e senza bava,
Senza velen coreger el difeto,
Contentarlo el capon come la fava;
Me lo perdoni Idio! no cambiaria
Co un genio celestial la sorte mia:
2Ma co a la mente me presento st'omo,
E pien de ingani e de malizia el vedo
De la natura sbregar suso el tomo.
Far che doveri e norme e legi e credo
Deti amor proprio, e con ingano somo
Robar, scanar, e far morir da fredo,
Vorave aver chiuchià da un orsa el late,
E andar, Dio mel perdoni, in quatro zate
3In tempi cussì tristi, che za folta
Xe la zente e corota, e dove scorla
La fiacola infernal discordia stolta,
Dove ambizion, e ipocrisia sa torla
Per so compagna, e va con ela in volta;
Dove calunia acuse ingropa e incorla,
(Che cussì xe in cità) soto qual vista
Lo vedio mai! solo el pensier me atrista.
4Xe per questo che in mezzo a le montagne
Dal mondo slontanà, squasi romito,
Passo tranquili i zorni in ste campagne,
E più el vilan, che 'l citadin, imito:
Vedo natura, e ne le so scondagne
Cerco de penetrar, ma no me irito
Se un velo me nasconde i so portenti:
Fazzo dei versi, e passo i dì contenti.
5Ma i dì xe curti e tristi, el sol ne manca,
Xe muti i prai, xe la campagna morta,
Sbrufa le bore, i giazzi el monte imbianca,
La neve de la vale xe a la porta;
Za za la fioca, za la tera è bianca,
Se ferma i fiumi, o in giazzo i se trasporta,
Cessa nei corpi el moto, e tuto indura,
Nè par ch'abia più vita la natura.
6Par che più vita no la gabia, e vero,
A l'omo che no è fato per amarla.
Ma quel che l'ama con un cuor sincero
Anca nel so riposo el sa trovarla
Sempre l'istessa a esercitar l'impero;
Elo la vede in tuto, e la ghe parla
Nei venti, ne la neve, e ne la piova,
E forsi assae più granda el la ritrova:
7Gh'è cossa che sia egual, maestoso inverno,
Al lusente vestiario, a la bianchezza
Che covre de la tera el velo esterno?
La nostra vita, non ancora avezza,
Esita de mandar al senso interno
Sto novo to splendor, e la belezza
Dei to cristali; intanto el sol radopia,
E l'iride del ciel in tera el copia.
8Qua solitaria a cantuzzar se sente
La passareta, che à trovà sgrafando
Qualche granelo che à lassà la zente;
Là i colpi el contadin va radopiando
Sul rovere che crola, e finalmente
Se vede a tera el tronco venerando,
Che serve al fio de fogo, e un tempo el pare
Avea coverto da fresch'ombre e care.
9La bora ruza, e 'l bosco la traversa,
E za la ingoba i più robusti pini;
Sentì a zemer la pianta, che roversa
La neve adosso ai picoli piantini,
E quei la so figura à squasi persa,
Pur vedè fra la neve al par dei spini
Le fogete a sbusar, che mai no i perde:
E missiar quel bel bianco al più bel verde!
10Ma el sol se mostra, e in mezzo a quel boscheto
De frassini sfogiai scherza el so ragio:
Fornii xe i rami d'un cristal perfeto,
Ch'ora par fato a torno, ora d'intagio,
Che va sempre cambiando in vario aspeto,
E se de fogo li fornisce el magio,
Se primavera li fa alora bei,
Più maestosi l'inverno i xe de quei.
11In mezzo de la vila a un largo fosso,
Che l'istà serve a imbeverar le armente,
Più de cento puteli vedè adosso,
Sbrissar sul giazzo, urtarse e darse spente,
E far scurzi e cascar, e a più no posso
Rider fra lori, e far rider la zente;
Altri za strachi, e fati un po più savi,
Se fa un fogheto, e se cusina i ravi.