La ve porta là de tuto,
Pan, polenta, bon persuto,
E vin duro e marzemin,
E la svoda el canevin:
La ga atorno dei putei
Tuti grassi e tuti bei;
Co de l'ua la li contenta,
E co un toco de polenta;
E depenta
Nel so viso è l'abondanza
Senza amor, senza giatanza:
La xe franca, la xe schieta,
La ghe sta a la barzeleta;
Dei bei prindesi la impronta,
La xe cara co l'è ponta,
La ve zonta
Sempre el vin in tela tazza,
E se sguazza,
E crescendo l'alegria
Tuti ponti se va via.
Per tuti i tempi,
Per tuti i dì
Sta cara Tognola
No xe cussì.
La xe inzucada,
La xe ingiazzada,
La va pensando,
E sbadagiando
Senza inacorzerse.
De sbadagiar;
La voria pianzerve
No la 'l vol far;
Ma inacorzendose
De sto difeto
La core a sconderse,
O la va in leto,
E da un dì al'altro
No ghe xe altro,
E la ve sfiamega
Come fa el sol;
La torna Tognola
Tuti la vol.
Come xe Tognola,
Cussì è l'autuno,
Che 'l corpo e l'anima
Consola a ognuno.
No xe caldo, no xe fredo,
Vedè tuto maturà,
No se vive più sul credo,
Se tripudia e se ghe n'à.
Chi va a la cazza,
Chi va a folar,
Chi 'l porco mazza,
Chi va a balar,
Chi co una cocola
Fa le brazzae,
Chi osela al rocolo,
Chi fa matae,
Disnareti,
Chiasseti
Spasseti,
Prindeseti,
Baseti,
Scherzeti,
Col goto in man
De vin teran
L'amor se celebra,
Ma no el tiran.
Ma za de un velo
Se coverze tuto el cielo;
Fa frescoto,
E la piova è qua deboto,
Za le nuvole se sera,
E la piova casca in tera.
Vigne, coli, campi e prai,
No pol esser spassizzai:
Seu per questo disparai?
Porco e fogheto,
E un bon bichier,
Polenta e in leto
Co so mugier,
Ve fa dolci anca sti zorni
Benchè sie' stupidi e storni.
Ma la bora
Dal nord vien fora,
Torna el sol
Che fa belo el pian e 'l col,
E va via
Mai umor, malinconia,
Sin che ariva co l'inverno
Neve e giazzo sempiterno.
