Perchè co sto arcidiavolo
Vustu passar i dì?
Se zonto: l'ochio fulmina,
Ma spesso el xe seren,
E amor svolazza, e cocola
L'ochio, el bel lavro, el sen;
Rabiada la ve morsega,
Ma in tuto el nostro amor
No se ariva sta diavola,
Che a morsegarme el cuor.
Do slepi, a confessarvelo,
Do slepi ò ricevù;
Ma dolci afeti e lagrime
Quanti no ghe n'ò bu?
L'è viva, l'è ardentissima
Co amor la fa impizzar,
Ma mi sto ardor teribile
Procuro de schivar.
La beca, sì, la pizzega,
Ma ve conforta un miel,
Che sin nel cuor s'insinua,
Che drento no ga fiel.
Spaventa quando s'agita
Quel viso in convulsion,
Ma gh'è i gran bei spetacoli
In quela agitazion,
Ghe xe dei zorni critici
Che 'l belo pol rapir,
Ma da là un poco un anzolo
La torna a comparir.
Negri i cavei finissimi,
Azuro l'ochio e pien,
Brazzo robusto e morbido,
Colmo e diviso el sen,
Vivo e grosseto el lavro,
Denti d'avolio, e fià,
Che senza droghe e aromati
Xe sempre imbalsemà.
La tinta vivacissima
Ch'al brun tenta inclinar,
Figura che una Palade
Faria desmentegar,
Se voi cussì depenzerla,
La fazzo al natural,
E tuto xe verissimo,
L'è Nina tal e qual.
E quei che disprezzandome
Da mato m'à tratà
Arivaria a invidiarme;
Letor, cussì è l'istà.
Toni, tempeste, fulmini;
Un ecessivo ardor,
Tavani, mosche, pulesi,
E seco distrutor;
Ma sempre el ton no strepita,
De raro el va a ferir,
L'aria e l'ardor se mitiga,
L'aguazzo sa vegnir,
E s'arde, se destermina
L'erbe e le biave el sol,
Natura xe in di sordine,
L'istà gnente ghe pol:
Ma i zorni serenissimi,
El caldo temparà,
L'ombre, i boscheti, i zefiri,
El ciel tuto stelà,
Le piove che ressuscita,
Che xe a le piante un miel,
Le aurore, i bei crepuscoli,
Che ve depenze el ciel,
I fiori odoratissimi,
I fruti, l'erbe, el fien,
Le biave, i campi fertili,...
Scordeu tuto sto ben?
No: se ghe xe dei radeghi,
Se fiero xe l'istà,
El pol ben compensarveli,
Se tanti beni el ga.
Nè regazza, nè vechiota,
No grassona, ma grassota,
Morachiota,
Furbachiota,
Xe Tognota.
La ga i ochi de carbon,
La ga tuto el resto bon;
La xe amiga, ma de cuor,
La se ride de l'amor:
Per servirve no la sua,
La ve tira zozo l'ua,
