Quatordes'ani,
Poco de più,
Do ochieti umani
Che varda in su,
Ma che ogni silaba
Li fa sbassar,
Un pur de laveri
Da sbasuchiar.
Ghe vedè in viso
Vivo el color,
Ma un scherzo, un riso,
Ve lo sa tor.
Xe i cavei l'ebano
Neto, lustrà;
Se la vol riderve
La perla è là.
El colo è bianco,
Colmeto el sen,
Xe tondo el fianco,
Xe 'l brazzo pien.
Gamba sveltissima,
Scarmo el penin,
Le carne morbide,
E tuto fin.
La primavera,
Za la vedè,
E viva e vera
Sta puta xe;
E la xe amabile,
Gavè rason,
Ma, assicurevelo,
No è tuto bon.
L'è tropo acerba,
Mi son sincer,
E un fruto in erba
No dà piacer;
Che se scampandone
La vol scherzar,
Sempre no comoda
Quel so scampar.
La sta un mumento,
Mai co se vol,
E sempre a stento,
Sempre ghe dol.
Se la ve cocola
La fa sentir
Un fredo, un grizzolo,
Che fa dormir;
Per un impianto
Ghe pianze el cuor,
Ma tanto pianto
No ga saor.
Dolce è la colera,
Se la ghe va,
Ma dura el nuvolo
Piu de l'istà.
Xe belo tuto,
E fresco e san,
Ma acerbo e 'l fruto
Col tolè in man.
Bei ochi, ma che fulmina
Se mai la fè alterar;
Bei denti, ma che morsega,
Se mai la fè irabiar.
Tempesta i slepi a refoli
Da quele bele man;
I afeti è capacissimi
De farve in cavruman.
La beca quanto un pulese,
La ruza da moscon,
La strepita, la pizzega,
Ghe vien le convulsion.
Se mi vogio depenzerve
Quela che m'à strigà,
Ste cosse descrivendove
Digo la verità;
E no gh'è al mondo un'anima
Che no me diga a mi:
