Fanatica sublima el caro Pich.
Caro Liarca mio, nu femo crich!
TRATTA DA PLUTARCO.
Sta matina mi ò leto
Sul celebre Plutarco
Una cosa che vedo
Imitada in gran parte
5Sul stato de S. Marco.
Lu dise, che Caton,
Omo severo, Senator giustissimo,
A' imprestà la mugier publicamente
Al Senator Ortensio, el qual smaniava
10De aver fioli da un fonte
Degno de la Republica Romana,
De aver dei Fabii, dei Scipioni, e Regoli,
E no, come tra nu, certi petegoli.
Da qualche tempo in qua
15In parte s'à introdoto
Sto esempio in stà Cità.
Se fa de le imprestanze,
O piutosto dei stochi e de le usure.
Perchè po' i fioli resta, o tristi, o boni
20Ai Siori Ortensi no, bensì ai Catoni.
Nel vastissimo Impero de la China,
Dove Legislator xe stà Confucio,
Questo à fato una Lege
Che in gran parte corege
5Quel maledeto vizio che à la Dona
De presto o tardi far
I corni ne l'amar,
La vol, che quando una,
Sia rea d'infedeltà
10Subito a questa el naso sia tagià.
Se una tal Lege ancora
Fusse agionta al Statuto Venezian,
Disème, Liarca mio, fra tante e tante
Che sente o finge, ma che sempre ostenta
15Le calde de l'amor gran smanie e pizze,
Quante e quante saria le nostre schizze?
SONETTO.
Sordo come che son ziro e spassiso
Osservando el moral de sta Venezia.
Più ch'l spirito vedo assae l'inezia;
4Più che saviezza vedo chiasso e riso;
Vedo l'omo d'onor squalido e sbriso;
Vedo el doto giazzà più de la Svezia;
Vedo patria e virtù tuto in facezia;
8Vedo Caton, ma lo vedo deriso;
Vedo qualche Lugrezia che consola;
Vedo Livia e Pompea sempre afolada:
11E vedo quela col bel Silvio sola;
Vedo arti e comercio zo de strada;
Vedo lusso, superbia, ozio e gola...
14Ah! Venezia d'un dì dov'estu andada?
SONETTO.
Co i fioli de Giacobe, el seme eleto,
In la Tera i xe entrai de promission,
Alora Giosuè la soa porzion
4A ognun el ga assegnà su quel distreto.
El solo Levi, per Divin preceto,
No l'è sta amesso in quela division,
Perchè lu (scomenzando insin da Aron)
8Al sacro Ministero el gera eleto.
Quanto a Levi, el Signor à comandà,
Che 'l Sacerdozio viva de l'Altar,
11Za che a servir l'Altar l'è stà chiamà.
Levi mo ancuo più no volendo star
A quela lege che 'l Signor ga dà
14I so fradeli el gera drio a spogiar;
E se Dio, che sa far,
Qua no mandava quatro Giosuè
17In tuto lu dirave: Ora pro me.
