In piassa
Èrimo[1] in piassa, lì, dove se sente
petogolessi e mesi discorseti
e se vede passar sempre contente
le serve indafarade fra i bancheti.
Cosa falo quel bossolo[2] de gente,
dise Nane, là in fondo a i portegheti?
Valà, g'ò dito mi, no sarà gnente...
solite storie... quatro puteleti...
Altro che puteleti!... Fra le séste[3]
de ste done de piassa che rasona,
fra i ombreloni e in meso a tante teste
quasi incantade de la so Verona,
Dall'Oca Bianca el ghe fasea le veste
col magico penel a la Madona.[4]
