La rosta1
A Guido Bianco
L'è un sito2 in riva a l'Adese che incanta!
Andemo Rosa!... no te vegni?... andemo!...
che fra un'ociada e un baso cantaremo
la canson de l'amor soto 'na pianta!
Su l'Adese, la rondina se vanta,
drio 'na barca che passa e sbate el rèmo;
spassesando su e zo, confondaremo
'na passarina che la sgola e canta.
E col pensier che passa inamorado,
indrissarò le to parole storte,
destacando un fioreto za sbociado;
scoltaremo de l'Adese el so verso
e fin che i cori3 i batarà a le porte,
te darò un pissigon a tempo perso.
