Pagina:Poesie e satire di Pietro Buratti veneziano.pdf/77

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.

     Coi ve facesse a posta un bel casoto
     Poderessi passar per un scimioto
                              E co le man in moto
     Mostrarghe a le donete la bravura
     De quel negozio che v'à dà natura.
                              Un fià da sepoltura
     Capace de infetar chi ve xè arente
     Ve esala da la boca senza un dente,
                              Che vostro veramente
     Chiamar se possa e che no sia pagà.
     Gavè l'ochio venereo, ma incantà,
                              Se tuto faturà,
     In testa un maledeto petaizzo
     E d'ogio e de manteca un tal pastizzo
                              Per andar col postizzo
     Che se sente el stomgo voltar,
     E arischieria per Dio de gomitar
                              Chi volesse tocar.
     Ma zà vù per i altri ve tochè
     E sempre co le man ve palpugnè
                              Quel porco de topè,
     E come fussi ancora un bardasson
     Se in camera gh'è un spechio, de scampon
                              Gavè la presunzion
     De fissar l'ochio e de mostrar che sè
     Quasi pago de vù. Ma no vedè
                              Che in paese non gh'è
     Un piavolo più degno del Borgogna
     Un tanterulo, un mostro, una carogna
                              Da gatolo, da fogna
     Che spuzza più de vù? Quele cossete,
     Quei do penini e quelle dò gambete
                              Sielo pur maledete,

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/77&oldid=58289"