CANZONCINA PER MUSICA
L'innocenza.
Siora mare! sta matina
(La indovina)
Canarin e canarina
Tuti dò col so zufeto.
Visti gò nel cesteleto
Far cuzzeto ― e smorosar.
Che sestini! che graziete!
A le strete
Gera i bechi, e co le alete
Certi moti i se faceva
Che convulsi li vedeva
Qualche tiro minaciar.
E de fati el maschio lù
(Proprio lù)
Salta, cerca, e monta sù:
Ne culia fa gnanca un moto,
Ma la coa ghe slarga soto
E và in oca el canarin.
Siora mare benedeta
(Son sempieta)
Se gavesse una chebeta
Poderia, co so permesso,
Cufolarme a far l'istesso
Con quel mato de Tonin?
