Pagina:Poesie e satire di Pietro Buratti veneziano.pdf/73

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.
SONETTO
PER LA CONTESSA SCOTTI

Strascinà da la stima universal,
     Rispeto, Contessina, la question
     Che sul nome de ludro e de buson
     Xè corsa in fazza el vostro tribunal.
E assai lontan de avermene per mal
     Me uniformo a la vostra decision
     E confesso con vù che un ludro son
     Dopo el fiasco per mi tanto fatal.
Ma co rifleto pò su la semenza
     Che avè sorbio, Contessa, in culo e in mona
     No trovo tra vù e mi gran diferenza.
Che se per zoventù vù sè busona,
     El no tegnir più ponto, in preferenza
     Ve anticipa la basa de ludrona.

SONETTO
PER LE SANTISSIME FESTE DI NATALE

O santissima nostra religion
     Senza meter in opera l'oselo
     De quel caro vechieto marangon
     Gesù s'à fato in ste zornae putelo.
Fio de l'Eterno, e come lù paron
     L'è nato a la sbaragia, e l'asenelo
     In compagnia del bò per compassion
     Ghe scaldava a so mare el paneselo.
El Diavolo à zigà da le so grote
     E come i russignoli in primavera
     I anzoli à cantà de mezza note.
Spuntar s'à visto i fiori in mezzo al giazzo
     I vilani xè corsi a farghe ciera
     E i gran Signori? no à savesto un cazzo.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/73&oldid=58301"