Che Beta iriflessiva e morbinosa
Dificilmente la chiapava bota,
Ma Cate per natura schizignosa
D'ogni termine in cuor faceva nota,
E pronta de ripieghi, e più inzegnosa
Su un vecchio Calepin cercando Pota
La gà capio de sbalzo che Potazza
Xè sorela carnal de la Monazza.
Un segno la ghe mete al Calepin
Deventada più rossa d'una brasa
E dandoghe una bota sul martin
A Beta che chiassava per la casa
Tasi, frasca, la dise a pian pianin,
Ch'el cuor me bogie più d'una fornasa,
O capìo tuto... o Dio!... son mezza morta
Pota xè questa, e la gavemo storta.
Beta dà un zigo, e Cate su la boca
Ghe slonga per quietarla una manina,
Ma Beta palpugnandose la coca
Voria verificar da berechina
Ipso facto se Cate xè un'aloca,
E Cate per un brazzo la strassina
A esaminar sul libro spalancà
De la Pota el vocabolo spiegà.
Assicurae dal Dizionario intanto
Che xè la Pota mercanzia da Dona
Le spande in bel dueto un mar de pianto
Per paura d'aver storta la Mona
Disendo, cossa val de Bele el vanto
Se ne resta sta fufa buzerona?
Femose cuor, vardemose a la presta
Per levarse sto pulese da testa.
