Pagina:Poesie e satire di Pietro Buratti veneziano.pdf/45

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.
LETTERA A MARIETTA


A sta letera Marieta
     Che te manda chi te adora
     In scondon de Tomboleta
     Daghe, o cara, un quarto d'ora.
Fra i to vecchi fotidori
     Chi te scrive xè el to biondo
     Che à godesto i to favori
     (Mercanzia de tuto el mondo)
Fin che unita co Vitoria,
     Celeberima Vacona
     Ti podevi ne la storia
     Farte un nome co la mona.
Che sestini, che alegria,
     Che graziete, che atenzion
     Co la sera in frezzeria
     Te vedeva sul balcon!
Da la vogia de far mini
     Mezza mata sul momento
     Quei to cari colombini 1
     No podeva più star drento.
Fora vita, fora brazzi
     Fora testa, fora colo
     Come Rè de tuti i cazzi
     Ti onoravi un cazzo molo.
Bondì biondo, a pian pianin
     Ti disevi, varda in alto,
     Varda in alto el mio Pierin
     Che deboto trago un salto.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/45&oldid=58339"