Dal so centro destacada
E dal Nord assae lontana
La par quasi indiavolada
D'esser nata Veneziana.
Co sberlefi e novi grugni
La palesa el so martirio
Volontà de far i pugni
Zà ghe vien nel so delirio 22
Piazza freme, Piazza sbufa
E la plebe che in sto stato
La lo vede da Martufa
Xè per dirghe dai al mato!
Dai al mato? Mondo critico!
Mondo porco! in sta maniera
De un furor anglo-politico
Se gà cuor de far cagnera? 23
Piazza freme che ridoti
Senza vele sia sti mari
Che no vegna pacheboti
A sbarcar Milordi e Pari.
Piazza sbufa che de bezzi
No ghe sia tra nù bubana
Che l'Italia in cento pezzi
Gabia el nome de putana.
Che da l'Indo al fredo polo
No sia despoti e paroni
Quei che porta el gropo molo
E le grespe ai pantaloni.
El voria: ma tegnì duro,
Senza spine no gh'è gloria
Xè l'osseto un poco duro
Ma xè certa la vitoria.
