Pagina:Poesie e satire di Pietro Buratti veneziano.pdf/200

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.

Che anca vù per via de buso
     Atestar con pergamene
     Podè ben che egual al muso
     Gavè un sangue ne le vene.
Piazza mio più che ve togo
     In esame, e in vù me fisso
     Più de Zara da quel fogo
     Per un Conte ve capisso.
Più conosso che vernise
     De Inghiltera xe quel ton
     Ma che andando a la raise
     Vù se nobile Schiavon.
Nè dal creder son lontan
     Che a merenda ogni matina
     Vù magnè da cortesan
     Un bocon de castradina. 5
No gh'è caso: la coltura
     No pol mai tuto bandir
     Parla in nù sempre natura
     E la vol farse ubidir,
Secondar i gusti oscuri
     Dei so nobili antenati
     Pol ognun fra quatro muri
     El negarlo xè da mati.
Castradina ve permeto
     Conte caro a crepa panza
     Basto solo ch'el licheto
     Staga sconto con creanza.
Basta solo che ale oto
     De la sera da Florian 6
     Se ve veda con un goto
     De cafè col late in man.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/200&oldid=58617"