Pagina:Poesie e satire di Pietro Buratti veneziano.pdf/150

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.

Che forse manco longa al paragon
     Xè la lista che mostra Trufaldin
     De le Done chiavae dal so Paron
     Fotidor per la vita e berechin.
Ma chi no pol, per Dio, storzer el muso
     A tante aversità che ne fà guera
     Dal zorno che se vien fora del buso
     Al zorno che finimo soto tera?
Che metendo in balanza el ben el mal
     Gà da creder sta vita un don del cielo
     E de so pare un merito real
     L'aver in mona parà sù l'oselo?
E per questo co se semo apena quà
     Prevedendo le buzare che gh'è
     E signori e spiantai zighemo .
     Sinonimo perfeto de l'oimè.
Co quel’ se lagna el fantolin
     Che senza desiderio d'esistenza
     El cazzo d'un marchese o d'un fachin
     L'abia messo in sto mondo per violenza.
E par ch'el vogia dir caro sior pare
     De farvelo menar a marteleto
     Gera pur megio assae da siora mare
     E de nini sporcar camisa e leto.
Che obligazion voleu che gabia mai
     D'un opera brutal d'una chiavada
     Che me mete per forza in mezzo ai guai
     D'una vita infelice e indiavolada?
Tegnirse in bon de cossa? d'esser stà
     Per prima necessaria condizion
     Nove mesi de fila ranzignà
     Ne la spuzza d'un'orida preson?

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/150&oldid=58549"