A l'ombra del mistero un zerotin
In carta ve destira, o Ipofileto,
Che aplicandolo al bus del martin
Pol ridurve in do zorni un bravo ometo.
Ma ghe vol fede orba per guarir,
Fede al zeroto magico e a la man
De chi no vol pedante comparir
Ma che no xe pò gnanca zarlatan,
E se mai domandessi la rason
Per cossa del zeroto vù dovè
Far sul buso del cul l'aplicazion
Risponderò che l'uso trà nù gh'è.
De indicar la pretesa col sinonimo
De spuzza al culo, onde s'el mal Xè là
Darghe del porco no dovè a l'anonimo
Se in quel logo el zeroto el vol puzà.
Ipofilo sentì: primo dover
De chi a le scienze, e ai studj se abbandona
Xe el persuaderse che chi vol saver
Prima del tempo o l'è un pedante o un mona.
Che l'inzegno del'omo xè un campeto
Che per produr a tempo e fruti e fiori
Gà bisogno de aratro, e de vangheto
De insistenza, destrussie e de suori.
Che prima l'omo teta, e dopo el magna,
Che la natura in tuto xè una scala,
Che de genj no gh'è certa cucagna
E chi se crede tal spesso la fala.
Che sculazzar se deve e l'asenelo
Tacarghe al colo in pena del matezzo
A chi con boca fresca dal cavielo
Adota del sacente el dotorezzo.
