Pagina:Poesie e satire di Pietro Buratti veneziano.pdf/126

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.

E a sta comica conquista
     Scedendo una francese
     À dovesto star in crista
     Tuti i cazzi del paese.
Ma se quietela sta infame?
     Vien adesso su la scena
     A promoverghe la fame
     Un amabile sirena. 5
Al so arivo do gran zizole
     Do famosi cicisbei
     I se scalda e messi in gringola
     I fa cosse da putei.
Sta promisqua simpatia
     D'amicizia strenze el nodo,
     I tol palco in compagnia
     I se vede andar in brodo.
Ma una sera che nel numero
     De l'ochiae no gera el cento
     In balanza perfettissima
     I s'à dito qualche afronto.
E divisi alora d'animo
     I s'à mosso guera averta
     Finchè el fiasco solenissimo
     À deciso una scoperta.
El trionfo, oh che vergogna!
     De chi xelo? de l'ebrea,
     Co i so incanti sta carogna
     La la tira presto a mea.
Regaleti, visitine,
     Figai d'oca, fruti, fiori
     Mile essenze peregrine
     Per la coca mile odori.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/126&oldid=58332"