Chi è nassuo un'Alessandro, habia pur'anca
D'Alessandro el costume, e benedeta
Sia la richezza in lù: tuto se meta
200In le sò man: niente al bisogno manca.
Ma chi deriva al fin da nobil schiata,
Chiare volte devia da quela strada,
Che i primi ha caminà: chiari degrada
204Da i so' Mazori, e la sò fama imbrata.
Me ingrinta più certa Canagia bassa,
De sangue vil, vegnua da le Valae,
Che fa de le gazete purassae
208Col magnar puoco, e col no' spender massa.
Homeni scelerai, pravi, e funesti!
Sò quel, che digo; e per morbin no' scrivo
Satire nò: ma son pelà sul vivo.
212Desperda el Ciel la tirania de questi.
Ingrati a l'Homo, a la Natura, e ingrati
A Dio pur'anca: e xè pecà ben grando,
Che quelo habiè, che, malamente usando,
216Ve fa parer d'humanità desfati.
