Il 1° — Mi sì.
Il 2° Te te ricordi, quando è passà l'idea
De batar soldi mati?
Il 1° Mi ò fato de le bele
Speculassioni alora con quei soldi! G'avea
Vendù l'ua; de palanche g'avea pien le scarsele,
— Ben, a comprar polenta par cavarme la fame
Coro in piassa; g'ò verto el saco, e 'l tegno soto;
Ecote sento i siga, no se tira più rame,
È tornado l'arzento adesso!
Il 2° E jeri oto
— No s'avaria giurado tuti che, co le tasse
Che avea proposto Euripide, par du milioni e più
S'avaria fato? E tuti parea che i lo indorasse,
E Euripide de qua, de là, de zo e de su!
— Quando po, fati i conti, s'à visto la rosaria
Del sior Viçenso, e volta e gira, e no bastava,
Alora el sior Euripide i l'à mandà par aria.
Il 1° Belo, no l'è l'istesso: alora comandava
— I omeni; e le done gh'è adesso.
Il 2° Ocio par questo,
. . . . . . . . . . ci no stà ben atento.
Il 1° Va là co le to bagole! — (ai servi) Fora le stanghe, presto!
Entra la Araldessa
Ar. Popolo, çitadini! l'è vegnudo el momento.
— Asvelti, avanti subito da la presidentessa!
E lì dirà la sorte, parsona par parsona,
El posto de la taola dove che i la g'à messa.
Le taole iè za carghe de roba bela e bona,
— E iè za tute in ordene. Starì come i signori
Sentadi sui cussini, che no machè......
