Questi è do mille in tutti, e commandai
I è da un'altro Roberto in compagnia;
Da quelli d'Inghilterra i è seguitai,
Che Gielmo Fio del Rè comanda, e invia;
Questi à tirar de frezza i è tanto usai,
Che un Pomo dalla Testa i porta via;
E con questi ghe xè certe Marmote
Delle Terre d'Irlanda assae remote.
Drian de questi l'è Tancredi, quello
Che de lù no ghe xè nissun più saldo,
Nè corraggioso più, gnanca più bello,
Se no'l fusse a fortuna el gran Rinaldo;
L'hà scantinà un tantin, quando'l Putello
Amor ghà cazzà in corpo un può de caldo,
Amor, che in t'un momento el xè nassuo,
E'l lo travagia ancora el dì d'ancuo.
Cusì se dise, che quella Zornada,
Che le Pache à i Persiani i nostri hà dao,
Doppo che da Tancredi seguitada
Xè stà quella Genia un pezzo in cao,
A cercando l'andava zò de strada
Dove 'l podesse destraccarse un fiao;
Quando in t'una Campagna bella, e piana
L'è andà à sentarse appresso à una Fontana.
Armada via, che'l muso una Puttazza
Mentre, che'l stava quà gh'è sorazonta
Questa giera Pagana, e quà gramazza
Per refrescarse anch'ella giera zonta,
Lù subito gha dao un'occhiadazza,
Che ghà cazzà in te'l cuor d'Amor la Ponta
O maravegia de sto Amor Furfante!
A pena l'è nassuo, che l'è un Zigante.
La s'hà tirà zò l'Elmo, e si no giera,
Ch'altri arrivava quà'l fava qualcossa,
Subito s'hà partio la Donna altiera,
Che la necessità de là l'hà mossa;
Mà la fattezza soa galante, e vera
Del so cuor el l'hà messa in te la fossa,
El s'arrecorda sempre el caso, e'l liogo
Che ghe fà crescer de continuo el fuogo.
E si ghe fusse qualche Birba fina
El se n'accorzeria de sta so dogia,
Perche sempre el sospira, e co'l camina,
Co i occhi bassi el và, e de mala vogia.
Ottocento el ghe n'hà, che gran ruina
Col so valor i ghe dà al Turco Bogia;
E questi xè vegnui dalla Campagna,
Che de fertilità xè una Cucagna.
