Tutti i Capi è vegnui, tutti i Soldai,
Noma Boemondo no s'hà visto gnente;
De Tortosa i contorni xè folai
E de drento, e de fuora dalla Zente;
S'hà unito un zorno i Capi più stimai
Per valor, per comando, e anca per mente,
Quando Goffredo con dolcezza fiera
El scomenzò a parlar in sta maniera.
Valorosi Soldai, che Dio v'hà eletti
Per desfar ste Canagie renegae,
Che'l v'hà fin desso tirà fuora netti,
E da Guerra, e da insidie mal tramae;
Tanto, che benche pieni de defetti
Del ben'havemo fatto in quantitae;
E à tanti turchi havemo tagià l'ose
Per spiegar i Stendardi co la Crose.
No credo zà, che habbiemo abbandonao
La nostra Patria, e i nostri Fioli cari,
Nè, ch'in sta Guerra s'habbiemo impegnao,
E che habbiemo passao quei nostri Mari,
Per haver finalmente po acquistao
Un può de fama, e un può de lioghi avari;
Che questo è puoco, e si volè, che'l diga,
No l'è debito premio à stà fadiga.
Mà'l nostro fin xè stà, se no m'inganno,
De soggiogar Gierusalem vicina;
E trar fuora i Cristiani d'un gran danno,
Che ghe dà sempre stà Zente Sassina;
E fondar un'Imperio senza inganno,
Che sia dell'Ingiustizia la ruina:
E che ghe sia permesso à ogni Creatura
De far le so Oration senza paura.
Si che fin desso assae s'hà risegao
Con honor puoco, e co fadiga tanta;
E'l nostro fin, che n'hà tutti impegnao,
Se andemo in altri lioghi el se desfanta;
Perche cossa ne importa haver menao
In Asia de i soldai mille, e millanta;
Se in pè de stabilir un niovo regno
De far noma fracassi i ghà desegno?
Fondar'un Stato l'è minchionaria
(Quando nol fasse Dio per so bontae)
In mezo de' Nemighi, e in compagnia
De puochi Patrioti, e Turchi assae:
No occorre certo alla Grega Genia
Crederghe un pelo, e manco alle contrae
Lontane de Ponente; onde mi digo,
Che'l fatto fina quà no'l val'un figo.
