O Musa vù, che de sta nostra herbazza
No ve degnè de circondar la Testa,
Ma suso in Ciel frà la celeste razza
De le Stelle ghavè Corona, e Vesta;
Deme da bever almanco una Tazza
De quel liquor, che fà saltar la Cresta;
Se missio intrighi al vero, e se ste rime
Per vù no sarà fatte, compatime.
Savè, che adesso del Poeta l'Arte
Dalla Zente inzegnosa xè stimada;
E che la Verità sotto ste Carte
Anca da chì no vuol la xè abbrazzada;
Cusì a i Putelli co i gha mal, à parte
Darghe de i Confettini è forma usada;
Mà in tanto el Fantolin beve la mana,
E perche l'e ingannao el se resana.
O gran Alfonso vù, che mi grammazzo,
Perseguitao dalla cattiva Sorte,
Me cavè fuora de tanto imbarazzo,
E posso dir de bocca della Morte;
Ve prego no me fè brutto mustazzo
Co sto libro accettè; mà feme forte;
Che forsi un Zorno canterò za fatto
Quel, che adesso de vù scrivo in astratto.
E sò de fallar, (se pur un zorno
Vignerà mai, che sia i Cristiani in Pase;
E che i vaga una volta tanto intorno
Fin, che i torna à far soe le Sante Case;)
Che non seguro de vederve attorno
La Terra quel Concier, che à molti piase.
Vù sarè el General; Vù al Tippe Toppe
Parechieve, che mì me fazzo in Poppe;
Sie volte al Lion el Sol giera arrivao,
Che i nostri giera in la Turchesca Terra,
Nicea, e Antiochia i ghaveva chiappao,
Questa con furbaria, quella con Guerra,
Doppo à i Persiani le pache i gha dao,
Che i ghe voleva chior l'ultima Terra,
E doppo, che Tortosa soa è restada,
In quella i fava fuora l'Invernada.
La Primavera à portarghe spavento
Zà scomenzava à i Turchi spasemai;
Quando Domene Dio dal Tron d'Arzento,
E d'Oro, e de Diamanti i più stimai;
Che tanto xè più in sù del Fermamento,
Quanto xè quel lontan da i Condannai,
El volta l'occhio in zoso, e in t'un'occhiada
L'hà visto tutta sta mondial contrada.