L'AVTTOR
AL LIBRO.
Libro, va là; mà ò Dio,
Quante gran volte m'hogio da pentir!
Quante volte hoi de dir
O magari podessio chiorte in drio!
5E si son pur sforzà
A dovertelo dir: Libro, va là.
E tì, minchion, ti tasi,
Nè te despiase andar? O poverazzo
No ti sà quant'impazzo
10Che t'haverà da dar e Lengue, e Nasi;
Ti ghà d'haver tagiae,
Che à qualchedun da ben farà pietae.
Mettite pur in posta
De sunar, e scussar botte, e colpetti;
15Paricchia pur Luchetti
Da impresonarte in bocca la Resposta,
E fà proponimento
D'ingiottir le spuazze à cento à cento.
Che si ti darà recchia
20A i Tarizini, che vuol dir la soa,
Mai vignerà la toa;
Con elli mai ti poderà far brecchia;
Lassa, lassa, che i sbagia,
Che zà no sbagia nome la Canagia.
25Basta che doppo diese,
Che t'haverà ben ditto, e strapazzao,
Ti vaghi, darecao
In man d'un Vertuoso, che cortese
No vaga drio la Sia
30De quella ignorantissima Genia.
E ghaverò pì à caro
Un, Sè, no'l dise mal, d'Homeni boni,
Che no haverò descaro
Un mier de, Che te pustu, de Babioni;
35Che ogn'un sà tarizar,
Mà ogn'un no sà nè commodar, nè far.
Mà varda no dir gnente
Per no cattar endegoli, e criori,
Che Granzi, e Granzipori
40Ti ghe n'haverà ben honestamente;
La saria troppo grassa
No haverghene nissun, mà ghe n'è massa.
Però scolta, si mai
Ti sentissi à schiopparte 'l Coresin
45De reffarte un tantin
Con chi disesse, Và à incartar Salai;
No te rabbiar; mà dighe
Con modestia, e humiltà ste quattro righe.
Sior, no disè cusì,
50Lezème prima tutto intrego; e pò
Si no ve piaserò,
Almanco in qualche liogo fè de mì
Tutto quel ,che volè;
Mà alla fadiga descrittion habbiè.
55Alla fadiga vera,
Per morbin alla prima scomenzada,
E doppo seguitada
Per no crederla mai quel, che la giera;
E quanta, e qual la fu,
60In qualcoss'altro far provèla vù.
Dighe cusì; e pò quando
Che'l te disesse; hò fatto questo, e questo;
E ti sbasseghe presto
El Cao co ti'l cognossi un'homo grando;
65Che co gh'è qualche Bravo,
Anca si l'è Bravetto, mi me cavo.
Mà; sè bondì, son stuffo;
Va là, va là: no me star più a seccar:
Dì; no dir; fà no far;
70Incontra ben, incontra mal, no sbruffo;
Me basta, lode à Dio,
D'haverte mi e scomenzà, e fenio.
