XC
Sentìo che tute al campo za scavezze
Gera dei archi le corde, o rosegà,
Nè i marii sgiaventar podea più frezze
4Per salvar la Romana libertà;
Senza riguardi a dessipar belezze,
Le mugier generose, desperà,
Tute zo intiere s'à tosà le Drezze,
8E in pe de corde le ghe l'à mandà.
De quele Drezze è stà tuta la gloria,
Tuta prodezza, e tuta vertù soa
11Se i Romani à cantà quela vitoria.
E se anca Nina l'arco al Dio d'Amor
No la gavesse armà co la so Coa,
14Fursi de mi no 'l gera vincitor.
