7Gh'è cossa che sia egual, maestoso inverno,
Al lusente vestiario, a la bianchezza
Che covre de la tera el velo esterno?
La nostra vita, non ancora avezza,
Esita de mandar al senso interno
Sto novo to splendor, e la belezza
Dei to cristali; intanto el sol radopia,
E l'iride del ciel in tera el copia.
8Qua solitaria a cantuzzar se sente
La passareta, ch'à trovà sgrafando
Qualche granelo ch'à lassà la zente;
Là i colpi el contadin va radopiando
Sul rovere che crola, e finalmente
Se vede a tera el tronco venerando,
Che serve al fio de fogo, e un tempo el pare
Avea coverto da fresch'ombre e care.
9La bora ruza, e 'l bosco la traversa,
E za la ingoba i più robusti pini;
Sentì a zemer la pianta, che roversa
La neve adosso ai picoli piantini,
E quei la so figura ha squasi persa,
Pur vedè fra la neve al par dei spini
Le fogiete a sbusar, che mai no i perde:
E missiar quel bel bianco al più bel verde.
10Ma el sol se mostra, e in mezzo a quel boscheto
De frassini sfogiai scherza el so ragio:
Fornii xe i rami d'un cristal perfeto,
Ch'ora par fato a torno, ora d'intagio
