7Gh'è paragon co l'aria sempia e pura
Che a cielo averto ogni mortal respira,
Che da principii soli la Natura
Ga savesto missiar, nè più ghe ispira,
Co quela d'una volta bassa e scura,
Che grassa su la testa se destira,
Arichìa da l'efluvio dei ventricoli
E da l'esalazion d'altri aminicoli?
8Se va donca al Cafè, piacer, delizia
De l'omo citadin in vari tempi,
Là se sragiona, ma co gran perizia,
Mentre no gh'è ignoranti, e no gh'è sempi,
E se ghe n'è, no i manca de malizia;
Solo la razza dei politici empi
Xe sempre muta, perche gh'è dei spioni,
Che inchieta ochiae, sorisi, ati e scorloni.
9Ma xe l'ora del pranzo, e presto presto,
Senza vardar se ancora el Sol sia in cielo,
Se va a incontrarlo; za xe pronto e lesto
Un lume de candela assae più belo.
El Sol per verità no ga un gran sesto,
Lo vede tuti, e po l'è sempre quelo,
Ch'el chiaror de più lumi Citadini
Lo vede chi ga inzegno, e ga zechini.
10Xe el pranzo silenzioso, o sussurante,
Secondo xe composti i comensali,
Sempre za grato, e sempre consolante,
Mentre o se magna in quiete da animali,
