Pagina:Berto Barbarani, I due canzonieri, 1917.pdf/65

Da Wikisource
Sta pagina la xe stà trascrita, ma la gà ancora da vegner rileta.
EL VECIO DA LA BANCHETA.


1.


     Ecolo qua! A sta ora chieta, chieta
che le serve e i soldà se guarda in facia
e el grio ghe core drio a la cavaleta,
par contarghe el so amor soto la macia,

     un vecio a strapegon su 'na bancheta
el se comoda a pian, che el par che el sbacia1
l'ultimo fià, spassando la piereta
col fassoleto, se de no el se macia.

     C'èlo sto vecio? A dimandarghe a lu,
l'à fato tute quante le campagne
e del coraio el ghe ne avea par du;

     Ma è passado i bei ani e le cucagne
e no ghe resta che pensarghe su,
come un decoto par le so magagne.

  1. che el sbacia: che sbadigli.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Berto_Barbarani,_I_due_canzonieri,_1917.pdf/65&oldid=70537"