Pagina:Berto Barbarani, I due canzonieri, 1917.pdf/59

CARBONETA.

I.

     In quel sporco granar de gran palasso,
gh'è un demonio de rati che rebuta!
Da un pare vecio e da una mare bruta
sempre malada, sora un leto strasso

     dove a la note par scaldarse, in fasso
la fameieta se ransigna¹ tuta,
Carboneta l'è nata par la suta,
co una voia de fraga soto el brasso.

     Carboneta, savio, no la g'à vissi,
e gnanca un specio da speciarse el viso,
e gnanca un fero da stocarse i rissi;

     ma i cavei carbonela e i oci neri
dove sluse un canton de paradiso,
con qualche teraina² de pensieri.

1. se ransigna: si aggomitola
2. teraina: ragnatela.