Pagina:Berto Barbarani, I due canzonieri, 1917.pdf/236

IV.

Quel l'è Beluno in testa a la valada,
     col sol d'Italia che ghe bate a i veri;
     più in quà, Ossenigo, trovà su par strada,
     più in quà, Rivalta, de fassada¹ a Peri.

Cese a remengo, quasi sensa intrada,²
     campanileti che no g'à pensieri,
     picoli, svelti, pronti a la sonada,
     come una compagnia de bersalieri...

Sia che Pasqua o Nadal ghe meta in mente
     che Dio l'è nato drento in te 'na tana,
     e po' l'è morto par la pora gente,

sia che i todeschi vegna zò a Verona,
     e le campane scampana, scampana,
     fin che dai forti gh'è el canon che tona!

1. de fassada: di rimpetto
2. intrada: rendite.