Pagina:Berto Barbarani, I due canzonieri, 1917.pdf/19

LUNA ROSSA E LUNA BIANCA

I.

     – Par cosa mò èla rossa
la luna? ― L'è rabiada,
el sol, così par scherso,
el l'avarà scotada;
     doman nasse disgrassie,
     bison tegnerla in bona,
     bisogna saludarla:
     – Siora luna parona!
               Ma la luna no parla...

E in çima a le montagne 'na vosse suta, suta,
sigava: Oh Dio, la luna, guardè come l'è bruta!
E un penacio¹ de pigno,² sbatù su e zo dal vento,
faseva tante sgogne,³ da l'uno fin al çento!

1. penacio: pinacolo
2. pigno: pino
3. sgogne: sberleffi.