Pagina:Berto Barbarani, I due canzonieri, 1917.pdf/18

FU FU

     Quando sento passar la ferovia,
me salta el mato de montarghe su,
de dirghe a tuti: Ve saludo, e via
col treno lampo, quel che fa: fu-fu!

     Fu-fu, che fuma, e alora cosa fèto¹
Neneta mia, che te vôi tanto ben,
che se manco una sera te vè in leto
co le mane incrosade in çima al sen;

     co le mane strucade, parchè el tasa
el cor che pianse, el cor che salta su...
El cor l'è el nostro paronsin de casa,
'na machineta che la fa: fu-fu!

1. cosa fèto: cosa fai.