LA MODA
La me morosa, quando che la sente
I primi fredi capitarghe adosso,
Mi no so cosa che ghe salta in mente;
La deventa cativa a più non posso!
E si che in casa no ghe manca gnente:
Carbon e legna la ghe n'à a l'ingrosso:
La g’à un camin che, basta starghe a rente
Un batar d’ocio, te deventi rosso!
Ma 'l dispiasser che g’à la me morosa
L'è, parchè, co sti fredi no la pol
Mostrar i brassi e sbaratarse1 el col...
E vedendo così, penso a ’na cosa:
Sta bela moda, l'andarà fenida,
Co la dona più nuda che vestida!
- ↑ sbaratarse - metter a nudo.
