Pagina:Attilio Turco - Sonetti Veronesi.djvu/100

I TRI APRILANTI DEL 1915

Tri aprilanti¹ e quaranta someianti!
     E 'stemo a vedar come che la buta...²
     Ma ghe ne tèmo³ che, par tanti e tanti,
     La fassenda la sia piutosto bruta!...

I se lamenta tuti i negossianti,
     Parchè gh’è de palanche ’na gran suta;
     E più de qualchedun no ’l tira avanti,
     Se no’ gh'è qualche Santo che lo iuta!

Par aria, intanto, rusa serte cose,
     Che le ne fa vegner la tremarela;
     Ci vede tute spine o tute rose,

Ci vol la passe e ci vorea la guera...
     Trento, Trieste... saria proprio bela,
     Poder cambiarghe presto la bandiera!...

1. tri aprilanti ― tre primi giorni d’aprile;
2. che la buta ― come si svolge;
3. ghe ne temo ― ho gran timore.