Nina in mascara

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
100 percent.svg
Qualità del testo: sto testo el xe stà trascrito e rileto.
Nina in mascara
1866
←  Che pecà! Edission e fonte ▼ A Nina napolitana  →
[p. 581 modifica]
NINA IN MASCARA.


O Moreta sbianchizada,
Co quei ochi da sassina,
Ti ga propio falà strada
4A sporcarte da farina!
No ti sa che i cavei mori
I xe tanti condutori
Dell'eletrico de amor,
8Che ne circola nel cuor?

E che un bucolo che svola,
Che ne sfrisa, che ne toca,
Ne fa perder la parola,
12E vegnir el pelo d'oca?
I to rizzi sbianchizai
No fa gnanca far pecai!
I xe propio come un fior
16Che ga perso el so color.

Che una dona a quarant'ani,
Che scomenza a farse grisa,
Cerchi sconder i malani,
20E confonder la divisa,
Se capisse: ma che tute
Volè farve vechie e brute
Per la smania de strafar...
24No la posso mastegar! —

Come vustu, moretina,
Che te tegna per sincera,
Se da sera alla matina
28Ti me cambi de criniera?
Col color de la natura
Se fa sempre più figura,
Che a comprar dal peruchier
32Quel che tuti pol aver.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Nina_in_mascara&oldid=41162"