Nel Centenario de S. Beneto

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
X. Nel Centenario de S. Beneto
1886
←  IX. Una visita sospeta Edission e fonte ▼ XI. A un turco evangelico da la Persia  →
[p. 85 modifica]
X.


NEL CENTENARIO DE S. BENETO
(1880)

[p. 86 modifica] [p. 87 modifica]


Zente da ben, che amè la religion
     E pur la patria no desmenteghè,
     Che dei Santi e de Dio ve recordè,
     4Perchè de là ve vien el megio, el bon,

Andè a San Zorzi1 e là co divozion,
     In quela bela Chiesa che savè,
     A quel Santo che in gloria trovarè
     8Diseghe un Paternostro in zenochion.

El lo merita ben San Benedeto:
     Prima perchè l'è un Santo, e Santo grando,
     11Che vol dir bon Cristian, anzi perfeto;

E po l'è un Santo che no stà de bando,
     Perchè el conserva anca lassù el segreto
     14De far, squasi, miracoli scherzando.

[p. 88 modifica]

                    Se mi andasse contando
Quelo che San Beneto e i so novizii
17Ga fato e fa contro al demonio e i vizii;

                    E tuti i benefizii
Ch'el ne ga fato coi so frati a miera,
20Ghe vorave dei libri a centenera.

                    Ma se in tuta la tera
Sto gran Santo e i so fioi ga lassà un segno
23Che d'ogni gratitudine xe degno,

                    Mi pò digo e sostegno,
Che Venezia più ancora ga rason
26De ringraziar sto Abate in zenochion

                    Come el so bon paron;
Perchè el cressar de ela e la so gloria,
29E dei fioi de Beneto la memoria,

                    La xe l'istessa storia.
Tanti xe i santi e i doti che a quel pare
32Ga arlevà in sen la nostra bona mare;

[p. 89 modifica]

                    Tanto preziose e rare
Xe le opere de inzegno che se vede,
35Basta che averza i ochi chi no crede.

                    Anca senza aver fede,
San Zorzi, San Michiel, San Zacaria,
38San Clemente, e una longa litania,

                    Che mai no finiria.
De chiese, e quadri, e libri e brava zente.
41Che da lu vien o che ghe xe parente,

                    Xe una prova evidente
De quel ben che n'a fato e ne fa ancora
44Sto gran servo de Dio che ancuo se onora

                    Per tuta Italia e fora.
Dunque zente da ben, (concludo mi)
47Andè tuti a San Zorzi in sti tre dì,

                    E feghe onor cussì
A San Beneto e a Dio che ne l'à dà.
50Ma no desmenteghè per carità,

[p. 90 modifica]

                    Dopo de aver pregà
Ch'el ve ajuta vualtri e el ve consola,
53De dirghe in t'una rechia una parola

                    Per quela nova scuola.
Che a furia de spropositi e biasteme
56Ghe fa la guera a Cristo e ai Santi insieme.

                    Preghélo ben, che preme;
Chi sa che certe teste che va atorno
59E che finora no capisse un corno.

                    No benedissa un zorno,
Se pur de patrio amor gh'entra una frégola,2
62San Beneto, i so frati e la so regola!




Note a cura de l'autor
  1. [p. 93]S. Giorgio; isoletta di fronte alla Piazzetta di San Marco, detta di S. Giorgio Maggiore, per distinguere quella dalla chiesa di S. Giorgio dei Greci, e dall'isoletta di S. Giorgio in Alga.
  2. [p. 93]frégola — briciola (da frangere?)
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Nel_Centenario_de_S._Beneto&oldid=55620"