Nel Centenario de S. Beneto
|
Edission original: |
Anonimo, Marco e Tòdaro, versi in vernacolo venezian de un mestro de Canaregio, Venezia, tipografia antica ditta Cordela, 1886 |
|
Fonte: |
| ← IX. Una visita sospeta | Edission e fonte ▼ | XI. A un turco evangelico da la Persia → |
NEL CENTENARIO DE S. BENETO
(1880)
Zente da ben, che amè la religion
E pur la patria no desmenteghè,
Che dei Santi e de Dio ve recordè,
4Perchè de là ve vien el megio, el bon,
Andè a San Zorzi1 e là co divozion,
In quela bela Chiesa che savè,
A quel Santo che in gloria trovarè
8Diseghe un Paternostro in zenochion.
El lo merita ben San Benedeto:
Prima perchè l'è un Santo, e Santo grando,
11Che vol dir bon Cristian, anzi perfeto;
E po l'è un Santo che no stà de bando,
Perchè el conserva anca lassù el segreto
14De far, squasi, miracoli scherzando.
Se mi andasse contando
Quelo che San Beneto e i so novizii
17Ga fato e fa contro al demonio e i vizii;
E tuti i benefizii
Ch'el ne ga fato coi so frati a miera,
20Ghe vorave dei libri a centenera.
Ma se in tuta la tera
Sto gran Santo e i so fioi ga lassà un segno
23Che d'ogni gratitudine xe degno,
Mi pò digo e sostegno,
Che Venezia più ancora ga rason
26De ringraziar sto Abate in zenochion
Come el so bon paron;
Perchè el cressar de ela e la so gloria,
29E dei fioi de Beneto la memoria,
La xe l'istessa storia.
Tanti xe i santi e i doti che a quel pare
32Ga arlevà in sen la nostra bona mare;
Tanto preziose e rare
Xe le opere de inzegno che se vede,
35Basta che averza i ochi chi no crede.
Anca senza aver fede,
San Zorzi, San Michiel, San Zacaria,
38San Clemente, e una longa litania,
Che mai no finiria.
De chiese, e quadri, e libri e brava zente.
41Che da lu vien o che ghe xe parente,
Xe una prova evidente
De quel ben che n'a fato e ne fa ancora
44Sto gran servo de Dio che ancuo se onora
Per tuta Italia e fora.
Dunque zente da ben, (concludo mi)
47Andè tuti a San Zorzi in sti tre dì,
E feghe onor cussì
A San Beneto e a Dio che ne l'à dà.
50Ma no desmenteghè per carità,
Dopo de aver pregà
Ch'el ve ajuta vualtri e el ve consola,
53De dirghe in t'una rechia una parola
Per quela nova scuola.
Che a furia de spropositi e biasteme
56Ghe fa la guera a Cristo e ai Santi insieme.
Preghélo ben, che preme;
Chi sa che certe teste che va atorno
59E che finora no capisse un corno.
No benedissa un zorno,
Se pur de patrio amor gh'entra una frégola,2
62San Beneto, i so frati e la so regola!
- Note a cura de l'autor