Mola el lavor
|
Edission original: |
Augusto Levi, Versi in dialetto triestino, Trieste, Caprin, 1915 |
|
Fonte: |
| ← Doman xe za quaresima | Edission e fonte ▼ | Blangèmose alla Colonia Americana → |
Dan dan! — Bati le oto,
Mola el lavor e vien,
Varda che bela sera,
Varda che ciel seren.
Dan dan! Bati l’orloio,
E fa tic-tac el cor,
Fa presto mio tesoro,
Andemo far l'amor.
Camina, camina,
Andemo al averto
Al bosco dei pini
Xe tuto un concerto;
Camina, camina,
Fa el grilo cri-cri!
E un grilo che canta
Go in testa anca mi.
L’orloio co se ferma
Se torna carigar,
Ma el tempo no se cariga,
Nè se lo pol fermar.
E finchè amor ne scalda
Godemo a far l’amor;
Xe oto, su distrighite,
Vien via, mola el lavor.
Camina, camina, ecc.
Fiorissi primavera,
El bosco xe un splendor,
In mezzo al bosco e al verde,
Ti pararà un gran fior.
Vien! Xe la vita un lampo,
Svola la gioventù,
Co se diventa veci
L’amor ne fa cucù!
Camina, camina, ecc.