Mistica
|
Edission original: |
Antonio Negri, In gondoleta, Barcarole e rime veneziane, Milano, Carlo Aliprandi, 1895 |
|
Fonte: |
| ← Neve e amor | Edission e fonte ▼ | A Venezia → |
La gera bionda, bionda come 'l mar
Soto un tramonto d'oro;
Se sentiva nel canto suo scherzar
4De rusignoli un coro.
Splendeva ne i so' oci el senso arcan,
Dolçe del firmamento,
Ghe portava dei basi da lontan
8De l'orïente el vento.
El mar ninava1 el so' sogno d'amor
Co un'intima dolçezza:
El sol scaldava el so' zovene cuor
12Co un'infantil carezza.
Le stele che sluseva su nel çiel,
In alto l'atirava;
La luna, col nebioso e bianco vel
16A l'anema parlava.
* *
....In una note nera, malinconica,
El vento ga ruzà,2
E el mar, el queto mar, fato teribile,
20Orendo, el s'à inrabià3.
El sol, el zorno dopo, nel çiel limpido
Sul mar s'à levà su....
Da quela note in çiel 'na fulgidissima
24Stela ghe xe de più!...