Le Quattro Stagioni Campestri e Cittadine/La Primavera Citadina
|
Edission original: |
Collezione delle migliori opere scritte in dialetto veneziano, Volume terzo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 3.djvu |
| ← III. La Primavera Campestre | Edission e fonte ▼ | V. L'Istà Campestre → |
1L'aria xe tepida,
Vien Primavera,
Fiorisse i bocoli,
Ride la tera,
E torna i zefiri
A svolazzar.
2I coli floridi,
I verdi prai,
De viole e anemoli
Tuti smaltai,
Invida i omeni
A vilegiar.
3Son persuasissima,
Cari poeti,
Andè, godevela,
Fè dei Soneti,
Che contentissima
Stago in Cità;
4Cussì, giustandose
Con del rosseto,
La bela Filide
Trà via el libreto,
Che ste sempiagini
Ga registrà:
5Fra mezzo ai alberi,
Mi sepelirme?
Povari pampani,
Voi divertirme,
Nei megio circoli
Vogio sociar.
6Come che un stolido
De un oseleto,
De l'erba un albero,
Qualche fioreto;
Podesse un'anema
Felicitar!
7Se dei volatili
Desiderasse,
De quei più mesteghi
Che me cantasse,
Subito, subito
Li posso aver.
8E se 'l capricio
Go de infiorarme,
A mazzi i bocoli
Posso comprarme
Con un daquindese
Dal mio fiorer.
9Ma Cafè, Circoli,
Partie brilanti,
Cenete, Musica,
Schiapi de amanti,
La solitudine
No me darà:
10Brava, ghe replica
La Cameriera:
Con quele grazie,
Co quela ciera,
L'andar a sconderse
Saria pecà!
11— Son una femena,
Cussì i m'ha fato;
Ma se so' un zovene
Devento mato
Solo a vardarmelo
Sto figurin:
12— Co ste to frotole
Devento rossa:
No so sta Venere,
Ma go qualcossa,
So sana e zovene,
Go del morbin...
13— E po co i omeni
Ve core drio;
Co 'l più teribile
Lo fe' un conìo,
Una marantega
Per Dio, no sè.
14Ma ne la camera
Entra fumanti
Tre o quatro zoveni,
Za tuti amanti,
Felicitandola
Del so levè.
15Chi porta un bocolo,
Chi un regaleto,
Chi ha l'ochio torbido,
Chi 'l soriseto,
E a tuti, Filide:
Cari, bondì:
16Stago malissimo,
Me dol la testa,
Ma pur voi moverme;
Sì, sì: a la presta
Quel Nelson, Momola:
Vegniu con mi?
17El no deciderse
Su sta domanda
Saria gravissima
Colpa nefanda;
Un vegno unissono:
La bela va.
18Chi ghe sta a latere,
Chi sta da drio:
La bela trotola
Col più gran brio,
E ochiae la sfiamega
De qua e de là.
19Come xe el solito
Se ariva in Piazza;
Più d'una Venere
De umana razza
Su e zo la pertega
Col so perchè.
20La nostra Filide
Le fissa tute;
Le ochiae teribili,
Le ingiurie mute
Za xe reciproche,
Come savè;
21Ma po la semena
Più fortunade
Sora dei omeni
Le dolci ochiade,
Spesso zontandoghe
Qualche sestin;
22E no la termina
La spassizzada,
Che diese o dodese
L'ha circondada;
E a tuti Filide
Ghe fa el bochin.
23Co la ga un numero
Che sia bastante
Per poder crederse
Dona trionfante,
La va altri pelaghi
A scorsizzar:
24Che miserabile
Passegio è questo?
No ghe xe un'anema
Che gabia sesto;
Chi vol me seguiti,
Vogio cambiar.
25Cussì disendoghe,
Verso la Riva
Va via sfilandose
La comitiva,
E ride el popolo
Da stolidon.
26Xe in campo el spirito,
E in t'un momento
Spiritosissimo
Xe l'argomento,
Che a tuti Filide
Ghe impresta el ton.
27Se fa tripudio
D'equivocheti,
Bon mo finissimi,
Pronti scherzeti,
Tuto se dopara,
E tuto va.
28Sempre istancabili
No xe le bele;
Se assae le trotola,
Le cede anch'ele,
Benchè recalcitri
La volontà:
29Vorave Filide
Andar più avanti,
Ma 'l fianco gravita,
Xe i pie pesanti:
Dov'è, la mormora,
Dov'è el Cafè?
30Cigando, i replica:
Semo a Castelo,
Marina Veneta,
Quelo è 'l cartelo.
— Lo vedo stolidi,
No me cighè.
31In fati, quindese,
Che ciga tuti
Con disarmonici
Tonazzi acuti,
Pol una Venere
Convulsionar.
32Novo spetacolo
Se ve fa avanti.
De ninfe Adriache,
E de galanti
Vedè la camera
Formigolar.
33Ma col so esercito
Filide avanza;
Tuto riceverlo
No pol la stanza,
E 'l più gran numero
Xe a ciel seren.
34Un sito comodo
Trova la bela;
Tuto è silenzio,
La tase anch'ela,
Però giustandose
La testa e 'l sen.
35Le ninfe Adriache
Come le bisse
Sora de Filide,
Se incanta fisse,
E le la esamina
Da capo a piè.
36Sta calma estatica
Vien interota:
De qua se mormora,
Là se barbota,
Chi cria: rosolio,
Chi chiama: tè.
37Se forma circoli,
Cresce el sussuro,
Se sente un strepito
Più del tamburo,
E se fa massima
La confusion;
38Nasse dei scandali,
E fra le prede,
Che ha fato Filide,
Qualcun se vede
A far el perfido
Sora el porton.
39Poveri diavoli!
I se conforta:
Star come i totani
Sempre a la porta,
Xe tropo barbaro
Tropo crudel!
40Li scovre Filide,
E in t'un ochiada
Vedè l'anatema
Za fulminada:
Destin teribile,
Per chi è infedel!
41Se co una scufia
Metè una gata,
Per Dio, quei stolidi
Va là e la grata:
I me fa stomego;
No i so sofrir;
42Cussì disendoghe
Ai più costanti,
La nostra Filide
Se mete i guanti,
Segno certissimo
Del so partir.
43Lo vede i perfidi
Quel fiero segno,
I lassa l'idolo,
L'idolo indegno,
Ma è tuto inutile
Nè gh'è pietà.
44Dei novi subito
Ghe vien arente,
Con quei la chiacola,
Con st'altri, gnente,
E la scomunica
À za operà;
45Che no gh'è un'anema
Fra quei disdoto,
Che a sti sismatici
Ghe fazza un moto,
E i se determina
Lassarla star.
46Andè col diavolo,
La bela dise,
Con mi, barzigole
No fa raise;
Ma doveressimo,
Sau dov'andar?
47A l'Oratorio
Dei Mendicanti.
Ghe xe la musica,
Xe zorni santi;
Andemo subito,
Femo del ben.
48Za co tre trotoli
Se ga i Coreti,
Che no me sofego
Coi zendaleti;
E là, stufandose,
Se va e se vien.
49Ma sento el stomego
Che vol ristoro:
Corio al Salvadego,1
O vad'io al coro?
Rispondè, pampani,
Dove? e cussì?
50Tuti xe pensili,
Gnissun risponde;
Più che la strepita
Più i se confonde:
Stupidi, stolidi,
E i vien con mi?
51La va a la Musica,
La xe in Coreto;
In bota el Nonzolo
Ghe dà el libreto:
Sampson..... Che titolo!
Disè, disè?...
52Sanson; quel diavolo,
Quel che filava?
No, quelo è l'Ercole.
Quel che i tosava?...
Latin... petèvelo;
Tolè, tolè.
53Tasè, petegoli,
Tasè, che i canta....
Chi xe sto cancaro?
Vergine Santa
Che scagno incomodo!...
Deme quel là;
54Questo me bagola:
Cossa... el dueto...?
Delai2 co l'oboe?
Oh benedeto!
Mi za lo strucolo;
Ch'el vegna qua.
55Fe' ch'el lo replica:
Vogio Delai...
Zente senz'anima,
Ste là impalai?
Che bela musica!..
Caro colù!
56Una dolc'estasi
La porta via,
Tuti xe atoniti;
La bela cria:
Presto al Salvadego,
No posso più....
57Ecola in tavola.
Quanti scherzeti!
Che ochiae che bisega!
Che prindeseti!
E su le fritole
Quanto scherzar!
58El pranzo termina
A cinque in ponto;
Tuti beatissimi
Paga el so conto,
E se va Filide
A ritirar.
59Mi no la seguito
In quei momenti:
Chi vol parlarghene
No xe prudenti,
E se gh'è fufigne
Mi no le so.
60Tornerò a vederla,
Sarò presente
A l'ora solita,
Co vien la zente,
E a l'Academia
La trovarò.
61Là al lume candido
De le candele,
Fra cento cocoli,
Fra cento bele,
Tinte più armoniche
La gaverà.
62E sin che i musici,
E i Sonadori
Farà del strepito,
Su tuti i cuori
La bela Filide
Trionferà.
63Tornerò a vederla,
Brilante in Piazza,
Rider, spartindoghe
Una fugazza
A diese zoveni
Brasai d'amor;
64Criando estatica:
Che bela sera!
Oh che delizia!
Gran Primavera!
Che stagion cocola!
Me cresce el cuor.
65Tornerò a vederla
Per sti Casini
O a magnar brocoli,
O sui matini
Dal famosissimo
Sior Valentin:3
66Ma sul mar tremulo
Sponta l'aurora,
Se svegia Zefiro,
I osei vien fora,
E va indorandose
Qualche camin.
67In cielo sfiamega
La luse d'oro,
La zente misera
Torna al lavoro,
E salpa l'ancora
El mariner.
68Pase o mia Filide,
E in vu destìli
Sono benefico
Sogni tranquili,
Fioli de Venere
E del piaser.
- Note