La legenda de la gondola
|
Edission original: |
Antologia della lirica veneziana, dal 500 ai giorni nostri, a cura de Antonio Pilot, Venezia, Giusto Fuga, 1913 |
|
Fonte: |
Indice:Pilot - Antologia della lirica veneziana, Venezia, Fuga, 1913.djvu |
| Edission e fonte ▼ |
La legenda de la gondola
Quando su sta laguna
A dei omeni in pene
’Rivava la fortuna;
Co’, da poche barene
E da qualche isoleta,
Venezia scominziava
A esser qualcosseta,
La gondola mancava.
Le barche grande e picole,
A remi e a vela, gera
Brute, pesante, ruvie,
Per i carghi e la guera;
No gh’era lussi e comodi
’Na volta, in sta Çità,
E per questo la gondola
A nassar ga spetà.
Quel mondo: che petegolo!
Tuti spiava tuti!
Tegniva drio gran ciacole
Ai fati beli e ai bruti;
Ne l’isolada e picola
Çità che se creava
De far l’amor paçifico
La libertà mancava.
Na note, a un’ongia, a un spigolo
Bianco, lustro, de luna,
Do moroseti timidi
Vardava la laguna,
E i diseva: “Podessimo
“Lontani scampar via,
“Basarse, darse l’anema,
“Lontani da ogni spia!„
La luna, là su in çielo,
Ste parolete sente:
La se slonga bel belo
E la ghe vien arente;
La ’riva a tocar l’aqua,
Le ondete un fià la frua,
Co l’aqua la se inturbia,
Co l’aqua la se stua:
Tuto quel bianco spigolo
Xe fato carbon nero;
Resta do ponte luçide
Come l’arzento e ’l fero.
Dise la luna ai timidi
Tosi: “Montè, no scoto!
“Galegio sora l’aqua,
“Co un remo dème el moto,
“E andè lontan da ciacole,
“Çerchè la vostra pase,
“Baséve franchi e libari,
“Fè quelo che ve piase!
“Stanote dago incarico
“A le stele più bele
“De far ciaro: le nuvole
“No scondarà le stele!„
I moroseti timidi
L’oferta ga açetà:
Co un remo sora l'aqua
La luna à navegà;
Fora del mondo i tenari
Basi gera permessi,
Gnanca le stele limpide
Fava petegolessi!..
Cussì nasse la gondola,
Galantaria de l’aqua
Fata per sta laguna:
Rica barcheta nera
Longa, fina, liziera,
Co do ponte de fero,
Co do ponte de arzento,
Se la deve al talento
De un’ongieta de luna,
Che, co tanto bon cuor,
Ga proteto una sera
El picolo mistero
De do tosi in amor.