La Tordina e i Tordinoti
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Vestio da festa, in gringola
Sponta dal mar el zorno,
Ragi sbrufando intorno
Per scialo de splendor.
5Fin quele giozze limpide
Che la rosada spreme,
Lu le converte in geme,
E brila l'erba e 'l fior.
Za la colomba rugola
10Inquieta su la gorna,
Svola, se pente e torna
La prole a carezzar.
Za i passaroti a nuvole
Sbrega l'aria improvisi,
15E in bozzoli o divisi
Va i campi a spulesar.
Sparpagna l'ara i vilici
De formenton, de biava,
Togna le strazze lava,
20Po le destende al sol.
Chi porta giande al maschio,
Chi monze vache in stala,
Chi la farina zala
Tamisa su l'albol;
25Chi va a siegar el rovere,
Chi buta 'l fen sul caro,
Chi carga el so somaro,
Chi giusta el so teler.
Al so bambozzo stupido
30Menega dà la teta,
Pasqua se fa la peta,
Po stizza su el fogher.
Vedendo l'ave atorzio
Che i fiori i ponze e chiuchia,
35Spessega la so guchia,
Core Lucieta al miel.
L'aseno a zampe a l'aria
Russa la schena in tera,
Par che 'l dichiari guera
40A scalzi e pugni al ciel.
Là, mentre l'oche e l'anare
Se sguatara in fossato,
Se smozza l'onge 'l gato,
Rosega un osso 'l can.
45Qua la galina celebra
El so trionfo novo,
La nascita del vovo
Col cocodè in sopran.
Marenda là su l'arzere
50Pastor, piegore, agneli;
Pulieri, soraneli
Pascola in mezzo al pra:
Qua 'l cazzador se furega
Quachio tra piante e piante
55Col so fedel argante,
Co l'azzalin montà.
Ma in coa del sol, a la lontana via,
Se va ingrossando un nuvoloto biso.
Che pien de mata invidia e d'albasia
60Ga 'l reo pensier de spegazzarghe 'l viso;
E za da drio de la colina el spia
Se 'l pol saltarghe adosso a l'improviso,
E tempestando a so dispeto un'ora
Castigar le campagne che lo adora.
65E, infati, mentre tuto brila e splende,
El se converte in negra bissabova;
El sciroco con lu za se la intende,
E ghe associa le nuvole che 'l trova.
Le prime 'l sol ghe le sbaragia e sfende,
70Coi ragi stafilandoghe la piova,
Ma core un nembo, drudo de la note,
A taconarghe le nuvole rote.
Scampa de qua e de là cani, pastori;
Done, galine, piegore sgambeta;
75Pianta 'l solco e la falce i segadori;
Uno perde 'l capelo, un la bareta;
Core soto le piante i cazzadori,
E un refolo insolente alza a la Beta
E cotole e camisa su la testa...
80Che spetacolo ai rospi, oh Dio, la resta!
Passava quelo da la marmotina,
E 'l s'à avudo a segnar per maravegia.
La campagna deventa una pissina,
Se cufa i osei, no i bate beco o cegia;
85Pur tra i rami d'un olmo una tordina,
Fata da un mese mare de famegia,
Stava ancora ai so fioi facendo scuola
De le teorie che à da saver chi svola.
Ma i so tre tordinoti, osei regazzi,
90Soliti andar, giusto a quel'ora, a spasso,
Vedendose a fiscar da quei scravazzi
Zogatoli, marenda, e svolo e passo,
Divorando le cime dei palazzi,
El monte, el bosco, i brontola, i fa chiasso!...
95«Maledeta sta piova (i ciga) e chi la...
E la tordina: «zito là, finila:
Pretenderessi, stolidi,
Volerghe vu insegnar
A chi sto mondo regola
100Che tempo l'à da far?
I ghe xe ancora i rocoli:
Se xe fenio l'avril,
Pensè a scansar le insidie
Del vischio e del fusil.
105Là, là, ghe vol del spirito:
Là ocore averlo a man!
Sau chi manda le nuvole?
Chi ve regala el gran?
Giove co mire provide
110Dà la piova e 'l seren...
No podaria mo piover
Forsi per vostro ben?
Vardè che umor! petegola,
Studia la to lizion...
115E vu, sior primogenito...
Parlo co ti frascon...
Mentre la savia mare in sta maniera
Stava dando ai so fioi la romanzina,
El borin spenze el nembo in Inghiltera,
120El scravazzo deventa piovesina,
El cielo va facendo bona ciera,
L'arco celeste abrazza la marina;
Sfodra i so ragi el sol: albori, vide,
Monti, selve, animali, tuto ride.
125Ma la tordina (che no ga in pensier
Che i so do tosi, che la so putela)
Col cuor d'acordo sul proprio dover
Coi ochi in ziro, sempre saldi in sela,
Scovre un oselador, che dal figher,
130Che fin alora ga servio d'ombrela,
Muto sbrazza el fusil, e za lo monta
Verso quel'olmo, là, dove l'è sconta.
«Un schiopo, un schiopo! O Dio! fioli, svolè.
Slarghè l'ale e la coa... presto anca ti...
135Racomandeve al Ciel... là, tuti tre...
Sul fenil, sul fenil... ve son drio mi.
L'oselador à tirà el can; ma che?
L'azzalin no risponde che cri-cri,
La piova penetrada sul fogon
140Gaveva sofegà fulmine e ton.
Ma quando la tordina
Scrocar sente 'l fusil,
Ai so tre tordinoti,
Che trema sul fenil:
145«Qua, qua, mozzina,
Qua, la dise, pissoti!
Slarghè quel'ale...
Zontè le zate...
Su quela testa!...
150Zo quela coa!...
Vardè là in alto!...
Stè là... cussì...
E disè quelo
Che digo mi.
155«Barba Giove (slarghè l'ale),
Ste tre povare cigale
Scioche, mate, ma pentie,
Pietà implora ai vostri pie
Per la so temerità.»
160Pietà implora ai vostri pie
Per la so temerità.
«Fioca fieve da quel monte?
Tuti tase... (zate zonte)
Tutti tase, come i deve;
165Nu mandemo fin la neve
A fiocar de là da Stra»
Nu mandemo fin la neve
A fiocar de là da Stra.
«Fa borasca? piove un'ora?
170(Su quel beco) e nu in malora
Sti tempazzi, e chi li à fati...
Ma vien po 'l castigamati,
Sponta el schiopo dal figher.»
Ma vien po 'l castigamati,
175Sponta el schiopo dal figher.
«Che se vu con un scravazzo
No cambievi 'l fogo in giazzo,
E la polvere in panada,
Barba Giove, che speada
180De tordine sul fogher!»
Barba Giove, che speada
De tordine sul fogher!
«Ma la mama à za risolto...
(Zo la coa) chi poco, o molto
185Se lamenta da recao,
La vol farlo dal babao
Su i nostri ochi sculazzar.»
La vol farlo dal babao
Su i nostri ochi sculazzar.
190«Se co nevega, o co piove
(Vardè in alto) barba Giove,
Ne vien più de sti caprizi,
Ah! fe un viazo e tre servizi,
E lassene fusilar.
195Ah! fe un viazo e tre servizi,
E lassene fusilar.
«Barba Giove... a capo, su...
Andè a marenda... e che ve senta più.»