La Medúsa
|
Edission original: |
Molena Spinacarpio, Bordizàndo, rime veneziane, Venezia, 1903 |
|
Fonte: |
Indice:Spinacarpio Moléna, Bordizàndo, rime veneziane, Venezia, 1903.pdf |
| ← El ramo | Edission e fonte ▼ | Afári veci → |
Al prà d'erba verde risálto dà i fiori,
al çiél scuro stele de tanti colori,
nel már lenta azúra e prima confusa
se staca una forma... la xe la Medúsa.
La par un bel fumo che sia cambiò in velo,
la par alabastro stà fuso nel çielo,
l'è tuta un velúdo co' dentro un ciarór
che in mile riflessi el cambia colór.
Ma se ve penséssi de trarla a la riva,
sparísse l'incanto che tanto rapíva:
e resta là un grumo ben slímego... aimė!
quel ch'ela deventa zà tuti savè.
L'istesso suçéde de più d'una tosa
tiráda... a la riva da chi no la sposa:
co' tute le bestie che naviga in már,
parcossa le oneste se và a tormentár?
