La Gallina e i Pulcini
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
Del mondo in una età
Una brava Galina avea coà
Varie spezie de vovi
Per grandi ogeti e novi;
5E da quei gera nato
Squasi tuti in un trato
I so bei pulesini,
Che gera picinini,
Oh bela! apena nati,
10Ma tuti spiritosi e squasi mati.
Apena ch'i à podesto saltuzzar
Tuti un progeto a parte à bu formar.
Stago su sto morer,
Questo sarà el mio aver,
15Uno diseva; e st'altro: In sto formento
Sarà el mio regno, e viverò contento.
Chi aveva una montagna, chi un boscheto
Chi un bel pra, chi un lagheto.
Infin chi qua, chi là
20I s'aveva isolà.
Guai chi avesse parlà
De unirse e infradelarse,
Guai chi disesse mai de concentrarse!
La Galina vedeva
25Tute le operazion che se faceva,
E gh'è qualcun che dise,
Che la se la rideva.
Ma finalmente un zorno
Che i sussurava tuto quel contorno,
30La i l'à chiamai davanti
Uniti tuti quanti,
E l'à dito: Putei,
Pulesini fradei,
Cossa ve salta in testa?
35No avè ale, nè cresta,
No avè fato el beco,
Se magri come un steco,
E parlè come Gali?
E ve scordè
40Che da mi dipendè,
Che mi v'ò fato nasser per ogeti
Degni de mi e perfeti?
Ah cari i mi putei,
Pulesini fradei,
45Quieteve cari, e magnè papa adesso.
Quando che dal destin sarà permesso
Ve darò stato, fioli, e lo farò
Come che crederò.
Vien dito che nissun disesse: oibò.
50Se fra i bipedi umani
Dei paesi Italiani
A isolarse qualcun pensa o destina,
Che 'l se recordi sempre sta Galina.