La Dea e l'Uomo
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
Una Dea del terzo cielo,
Vegnindo a spasso in tera,
S'avea degnà de amar un pastorelo,
E per quanto pol far
5Una Dea con un omo,
La lo saveva amar.
Vu ve podè pensar
Qual fosse in sta aventura
El stato d'una povera creatura.
10Infiamà,
Passionà,
L'avaressi osservà.
Qualche volta avilio
Qualch'altra imatonio,
15E gh'è stà dei momenti
Che l'à credesto deventar un Dio.
Povero barbagian!
Chi xe uman, resta uman.
Sta Dea, stante el deismo,
20Viveva suso in cielo,
Ma la se fava veder
Anca dal pastorelo.
Un dì la dise: - Puto,
Te voi felicitar,
25E vogio che ti vegni
Doman con mi a disnar.
Pensève l'alegrezza
Che in elo l'à provà!
Quel dì no l'a disnà,
30Nè la sera cenà
Per farse onor co sta Divinità.
Co le idee ch'el gaveva
El bon pastor credeva,
Che come i Dei coi omeni
35In tuto i ghe va avanti,
I magnasse da manzi o da elefanti.
Vien l'ora, e in certo sito
Che la gaveva dito
La lo stava a spetar;
40E lu, senza falar
Un minuto secondo,
El trova là un palazzo
De quei che no gh'è al mondo.
Sta Dea donca riceve
45L'ogeto del so amor,
Come che de un Tabaro1
Farave un Senator,
Con un'aria ridente,
Ma che no è confidente,
50Con espression de afeto,
Ma che vien da la testa e no dal peto,
E con un tal contegno,
Che de una Dea xe veramente degno.
El nostro pastorelo
55Sta là come un putelo,
Nol olsa de parlar, de alzar i ochi,
E ghe trema i zenochi;
Ma el pensier lo ricrea
De magnar la menestra
60Co la so cara Dea.
Xe in tola. O che possae!
Che piati, che terine
Tute quante storiae!
Che parechio curioso!
65Che desèr delizioso!
Che vasche, che bei fiori!
E dai piati che odori
Che se fava sentir!
El pastor za scomenza a sgangolir.
70La Dea co le so man
Vol darghe da magnar al nostro uman;
Ma quando el mete in boca
Gnente el palà ghe toca,
Che d'una spezie d'etare ogni piato
75A l'usanza divina gera fato.
El so gusto ghe gera,
Ma el palà del pastor, fato de tera,
No podeva sentir
I sali impercetibili
80Che lo andava a ferir.
Pur el fa finta per riputazion
De magnar de quei cibi
Co tuta devozion,
Ma da la fame orenda
85Za deventà rabioso,
El lassa alfin sul piato
Ogni cibo prezioso.
La Dea, che se ne acorze,
Dimanda al pastorelo,
90Perchè nol magni quel che i magna in cielo.
El se trova intrigà,
Responderghe nol sa;
Ma pur incoragìo
Dal titolo de amante,
95El dise: Fia de un Dio,
Me par che lo gavevi da saver
Che mi son tera, e che vu se' pensier;
E che dovevi, avendo da tratarme,
O umanizarve, o mi divinizarme.
100Se no temesse, amici, de chiamarme
I castighi del cielo,
Co l'esempio del nostro pastorelo
Vorave ste Divine consegiar
De farse venerar
105O in prussission, o sora d'un altar;
Ma a no far la sempiada
De smorosar coi miseri mortali
No dandoghe che pranzi celestiali.
- Note
- ↑ Uomo di condizione inferiore all'ordine patrizio.