L'Occhiale
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
Gh'era un certo Signor
Che provava el dolor
De veder ch'i so amici
Se credeva felici,
5Vedendoghe, per quanto che i diseva;
Assae de più de quel che lu vedeva.
De sta cossa pica
Co qualchedun de lori el s'à informà
Come el podeva far
10La vista a megiorar.
Questi à risposto in bota
Va là da Selva e trota;
El te darà un ochial
Che farà che ti vedi manco mal.
15Da l'Otico l'è andà,
L'ochial el ga trovà,
E l'à visto i ogeti
E più vivi e più neti;
Tanto xe sta el piaser,
20Che in sta scena gh'à parso de goder,
Che l'è tornà da Selva a domandar
L'ochial più bravo che se pol trovar.
E l'Otico gh'à dà
L'ochial più bravo che sia sta inventà.
25Contento la matina
El va a trovar la so dileta Nina;
Ma, oh Dio! ch'el viso belo
Deventa un redeselo;
L'ochio, a trar dardi avezzo,
30Oribile strambezzo,
E i lavri porporini
Borondoli o cuscini,
Che par giusto fodrai de marochini.
Lu, bestemiando insina i Cherubini,
35Maledindo l'ochial, l'artista e l'arte,
El l'à trato per sempre da una parte.
Per l'istessa rason,
E con l'istesso ton,
Quante volte che ò dito, e che diria,
40Sia maladeta la filosofia!