Il Re e 'l suo Buffone

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
Il Re e 'l suo Buffone
XVIII secolo

 Edission original:   

Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817

 Fonte:

Indice:Collezione delle migliori opere scritte in dialetto veneziano 2.djvu

Edission e fonte ▼
Altra edizion: El re e 'l so bufon (1845)
[p. 45 modifica]
IL RE E 'L SUO BUFFONE


Imitazione di un Apologo Tedesco


Ai tempi ch'el regnar
     Consisteva in poderse sodisfar,
     Un Re, che se chiamava Woldmar,
     El qual s'aveva in tuto sodisfà,
     5E d'ogni cossa za s'avea stufà,
     Co tuta quanta la so Signoria
     Lo mazzava una negra ipocondria;
     E per colmo dei mali ch'el sofriva
     Un momento la note nol dormiva.
     10Quando un dì, per distrarse, l'è andà a cazza
     Come che usava i Re de la so razza,
     E la strada falando,
     El s'à trovà in t'un precipizio grando.
     In sto tremendo intrigo
     15El so Bufon, che gera anca el so amigo,
     (Cariche separae,
     Ma che se trova in Corte combinae)

[p. 46 modifica]

     El qual no aveva un momento abandonà
     El so amigo Maestà,
     20Passando rischi che no gera picoli,
     À tirà fora el Re da quei pericoli;
     E sti do amici al fin
     S'à trovà sora un lago cristalin.
     Su quelo dominava
     25E maestoso ne l'acque se spechiava
     Un rovere vechion,
     Che faceva più ombra d'un cason;
     E soto quelo con el cuor contento
     A l'ombra fresca, e rinfrescà dal vento,
     30Con el più gran savor
     Dormia su l'erba un povero pastor.
     So Maestà s'à fermà.
     Dorme un bifolco, e de dormir l'è degno,
     E mi no dormo, e son paron d'un regno!
     35Per Dio! rinunziaria
     La mia Sposa Real, e doneria
     Sin la mia simia istessa, se una note
     Dormisse come dorme ste marmote.
     Caro amigo Bufon, dime perchè
     40No trova requie el povero to Re? —
     — Sire,
el risponde, no la trova el sono,
     Perchè la dorme tropo sul so trono.

     Per disgrazia del Bufon,
     Tropo ingenuo xe stà el ton,

[p. 47 modifica]

     45Mentre el Re per dignità
     De la Sacra so Maestà,
     Tolta l'asta de la cazza,
     Con clemenza sta bestiazza
     L'à coreto de l'eror
     50Col cazzarghela in tel cuor.
     Anca sta volta el Re s'à sodisfà
     Ma pur el sono no l'à mai trovà.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Il_Re_e_%27l_suo_Buffone&oldid=68934"