Epilogo
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Ai birbi e ai stolidi
Mi fin adesso,
Come vedè,
Fat'ò 'l processo.
Cinquanta favole
6Bastele? ohimè!
Ma za le chiacole
Me mor in boca,
No posso più!
Soto a chi toca:
Fora quel pifaro,
12Poeti, a vu.
Vizi e spropositi?
L'isola è piena;
Proprio la par
Quela balena
Che ingiote e gomita
18I pesci in mar.
Ma quel proverbio,
Che un dì brilava,
Xe ancora in ton:
«Perde chi lava
La testa a l'aseno
24L'acqua e 'l saon!»
Vegna pur l'etica
E la poesìa:
Per diana, sì!
A butar via
Rime e rimproveri,
30E a secar i ...!
Superbia indomita,
Caprizi mati,
Smania venal,
Gà cambià in fati
L'orbe teraqueo
36In ospeal.
L'è fato a circolo?
Lasselo tondo.
Chi tor mai pol
I vizi al mondo,
L'acqua l'oceano,
42El fogo al sol?
Vedeu del Berico
Là le coline?
Viva 'l bon vin!
Quel'ue divine
Converte i spasemi
48Tuti in morbin!
Voi che a l'unissono
Cantemo in bota,
Co sarò là,
Una vilota
Mi e la mia tragica
54Necessità.
Perchè no libero
Viver in Franza?
Là tut è bien:
Ahi l'eguaglianza
Per virtù magica
60De tu fe rien!
Voi la sinderesi
Sempre in bonazza.
Se trovarò
Qualche regazza
L'amor platonico
66Ghe insinuarò.
E perchè l'ozio
Fa l'esistenza
Languida e vil,
Co so a Vicenza
Me compro subito
72Vanga e bail.
Farò coi vilici,
A chi più sua,
Gara d'onor.
Folarò l'ua,
Sarò botanico,
78E oselador.
Mi per antidoto,
E vu per boria,
Sgobeve pur,
Feve a la gloria
Per man dei secoli
84Eroi condur.
Là no voi letere
Da chi che sia;
No voi saver
De signoria,
S'anca i fa un ravano
90Per consegier.
Per far, a dirvela,
Che de mi proprio
Se scordi ognun,
Go impastà d'opio
Tut'i mii apologhi,
96Uno per un.
Ma i coli Berici
No xe lontani,
Nè zo de man:
Vien su i paesani,
E ogni dì capita
102Zente dal pian.
De qua un pacifico
Giobe in zavate,
Che torna su
Per torse el late,
Che a chi sa monzerla
108Dà la virtù!
De là una timida
Famegia in tochi,
Che cambia ciel
Prima che i stochi
Per mana e netare
114Ghe venda fiel.
Là un aristocrato
Che per far fogo
Brusa el baul.
Qua un demagogo
Scazzà dai nobili
120A pie in tel cul.
Sti malinconici
Pol aver torto?
Chi no, chi sì.
Qualche conforto,
(Za che i xe omeni)
126Ghe 'l daria mi...
Ma, se burlemio?
Fala danari!
Ogio d'andar
Qua zo a tabari,
E st'elemosina
132La sù portar?
Un socorendone,
Saria beato
Poderghe dir:
Sii pur ingrato,
Povero diavolo,
138Ma no perir.
Fortuna ascoltime:
Se ti ga cura
De sta intenzion
Pesa, misura...
No vogio invidia,
144Nè compassion.