El solitario de Nina

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
XIV. El solitario de Nina
(a Raffaello Barbiera)
1892

 Edission original:   

Attilio SarfattiLe Rime Veneziane e Il Minuetto, Milano, Fratelli Treves Editori, 1892

 Fonte:

Indice:Le Rime Veneziane e Il Minuetto.djvu

←  XIII. Tipi Goldoniani Edission e fonte ▼ XV. Lontananza  →
[p. 183 modifica]
XIV.


EL SOLITARIO DE NINA

(A RAFFAELLO BARBIERA)


Qua metemo sto sete, e qua calemo el re,
St'asso de cope in alto, portemo zo sto tre.
Cussì va ben... No, caspita! sto quatro no ghe sta...
Passatempo da veci, che tuti i veci sa!
5Bel conforto! che scala, che bruto cambiamento!
Da putei, freschi, alegri, tuto el dì in movimento,
Se sta insieme a dozene, se zoga in vinti, in trenta,
Se core, se fa el diavolo, se fa quel che talenta,
Come farfale liberi, senza pensarghe su,
10Se crede che sto mondo gabia a zirar per nu.
Fioi che pianze vol cresser, e i fioi pianze per tuto,
Ma no xe quele lagreme de tristi zorni el fruto,

[p. 184 modifica]

Ma no se pianze alora come se pianze dopo,
Ma no sente in gola e drento el cuor un gropo...
15Come s'el sol ridente ilumina la piova,
El pianto e l'alegrezza in viso ai fioi se trova.
Co vien l'età più seria, la bela zoventù,
I povari zogatoli no se li çerca più.
Alora i vinti, i trenta, xe assae, no i ve convien,
20Se trova che i xe tropi, che in pochi se sta ben,
O megio anzi se trova che un solo se confà,
Lontani dala mama, dai oci del papà.
Se parla, se fa visite, se leze el romanzeto,
Se vive nele nuvole, se ga qualche segreto,
25Se pesta el pianoforte, se bala nei festini,
Se lassa per i comiçi de carne i buratini,
e un bel momento, come se ve sbociasse un fior,
Se sente drento el peto, farve tic-tac el cuor.
Un bel dì el matrimonio, feste, auguri, promesse,
30Signorine in signore, contessine in contesse,
Se cambia nome, titoli, vita da çima a fondo,
Çercando la so parte de sol in sto bel mondo.
Ma signorine o done, el pensier ve tormenta
Dela vita e del mondo che consola e spaventa.
35Se perde a poco a poco la cara inzenuità,
El cuor incontentabile sempre sofrir ve fa.
Sola delizia vera, un dì ciamè el mario,
E ghe disè in segreto... basta, m'avè capio.
Mame deventè none, none de neve bianche,
40Cole rughe sul viso, piene de afani e stanche,

[p. 185 modifica]

Scordade dai amiçi, lassade in un canton,
Finì la vita senza pericoli e passion.
E per gran vostro spasso, per sbarcar el lunario,
Ve dè el divertimento de far... un solitario.
45Oh a proposito, quasi me scordava anca questo:
Sto quatro va più in alto, sto re vien tropo presto.
Qua, no gh'è caso, un sete, se no... va tuto mal...
Oh xe qua Tita! caro quel gran original!
A monte el solitario... so vecia, nona, e bianca,
50Ma no so miga morta, ma no so miga stanca,
Vegnì, vegnì, delizia... le carte pol falar...
Ma el cuor de un bon amigo? Quelo xe un altro afar!

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=El_solitario_de_Nina&oldid=49098"